睇完演唱會後感

尋日同老婆去睇903id club拉闊音樂會(陳奕迅x梁漢文x楊千嬅), 音樂會成個流程, 表演者同音樂都好正. 去到ENCORE果段三位傾計講趣事都十分出位, 唔去睇真係一個損失.
小弟亦都去過中日韓等地睇演唱會/ 音樂會, 今次表演既水準已係國際級數, 可惜既係香港"人"既水平低過外國好多.
香港演唱會總有一樣係共通既, 就係"例遲開場", 張門劵寫明20:15開場, 但最後到21:00先開始. 點解大會係就班"例遲"既觀眾而遲開場? 係外國係一夠鐘就開始, 遲到係果班觀眾既損失. 就正正因為主辦單位為咗就班"例遲"既觀眾而令準時到場既觀眾白等, 咁樣只會教育其他觀眾越來越遲到場.
入到場見到有D觀眾個位俾其他人坐咗, 工作人員叫坐咗係位既人仕出示番入場劵時佢地自己就即刻自己行開. 明知係呢D爆場既演唱會無可能有空位無人座, 令到自己大出洋相.
開場前場地講明唔俾影相, 但開咗場D人照影, 仲要俾工作人員捉到三番四次去到面前提醒佢唔俾影相, 好心入場諗住影相既人考慮一下其他人既心情, 帶部只得kit鏡既單反機入到去可以影到咩先啦, 自己坐緊十幾行, 用17-55f3.5-5.6鏡, 部機扭去A MODE(但係只識用LIVE VIEW嚟較光圈), 仲要ISO 同WB SET AUTO, 影出嚟既結果最後係"鬆郁蒙". 仲有單反每次影相時塊反光板"擦擦"聲好影響人架, 你下下舉機又遮住後面既觀眾. 完全係一個自私精所為.
呢次演唱會大會每人派一對會閃既BonBon棒, 算係敗筆之一, D人係唔係都係都Bon, 係唔係都係都舉住FING, 完場時又四處掉, 製造大量垃圾.